அணு உலைகள் சாதக பாதகங்கள் ஒரு அலசல் - பாகம் 4

                        தராப்பூர் அணுமின் நிலையத்தை தொடர்ந்து கனடா நாட்டு தொழில்நுட்பத்துடன் ராஜஸ்த்தான் மாநிலத்தில் ராவத்பாட்டா என்னும் இடத்தில் அடுத்த அணுமின் நிலையம் ஆரம்பிக்கப்பட்டது. இந்த அணுஉலை CANDU மாதிரி அணுஉலை எனப்படும். CANDU REACTOR என்பது  CANada Deuterium Uranium REACTOR எனப்படும். இந்த அணு உலையைப்  பற்றி சிறிது காண்போம்.

                      CANDU அணுவுலையை அழுத்தப்பட்ட கன நீர் அணுஉலை (PHWR- Pressurized Heavy Water Reactor) என கூறுவார்கள். இந்த அணுவுலைக்கும் BWR அணுவுலைக்கும் சில முக்கியமான வித்தியாசங்களை கீழே காணலாம்.

BWR	PHWR
செறிவூட்டப்பட்ட யுரேனியம் எரிபொருளாகப் பயன்படுத்தப் படுகிறது. அணு உலையே பாய்லர் ஆக செயல்படுகிறது. சாதாரண கனிமங்கள் நீக்கப்பட்ட நீரே மிதமாக்கியாக   (Moderator) செயல்படுகிறது.	இயற்கையாக கிடைக்கக்கூடிய யுரேனிய தாது எரிபொருளாகப் பயன்படுத்தப் படுகிறது. அணு உலை மற்றும் பாய்லர் என இரு சுற்றுகளாக உள்ளது.  கன நீர் மிதமாக்கியாக   (Moderator) செயல்படுகிறது.

கனநீர் என்பது என்ன? 

                   கனநீர் என்ன என்பது தெரிந்து கொள்வதற்கு முன் ஓரிடத்தான் (Isotope) பற்றி தெரிந்து கொள்வோம்.  இங்கு காண்பிக்கப்பட்ட படத்தில் மேலே உள்ளது ஹைட்ரோஜென் அணுவின் அமைப்பு ஆகும். இதில் ஒரு ப்ரோட்டானும் ஒரு எலெக்ட்ரானும் உள்ளது. இந்த அணுவின் அணு எண் 1 (ப்ரோட்டான் எண்ணிக்கை) மற்றும் அணு எடை 1 (ப்ரோட்டான் மற்றும் நியுட்ரானின் கூட்டுத்தொகை) ஆகும். கீழே உள்ளது டியுட்ரியம் அணுவின் அணு அமைப்பு ஆகும். இதில் ஒரு ப்ரோட்டானும் ஒரு நியுட்ரான் மற்றும்  ஒரு எலெக்ட்ரானும் உள்ளது. இதன் அணு எண் 1 அணு எடை 2 ஆகும். இதுபோல ஒரே அணு எண்ணும் வேறுபட்ட  அணு எடையும்  கொண்ட அணுக்களை ஓரிடத்தான் (Isotope) என்பார்கள்.  அதாவது டியுட்ரியம், ஹைட்ரொஜெனின் ஐசோடோப் எனப்படும்.

                                             இபபோது கனநீர் பற்றி பார்ப்போம். சாதாரண நீர் H2O , கனநீர் D2O , அதாவது இரண்டு டியுட்ரியம் அணுவும் ஒரு ஆக்சிஜென் அணுவும் சேர்ந்தது தான் கனநீர்.

                             இந்த அணு உலையில் கனநீர் பயன்படுத்த முக்கிய காரணம் நியுட்ரானை கவரும் தன்மை இதற்க்கு மிகவும் குறைவாகும். ஏன் என்றால் இந்த அணு உலையில் எரிபொருளாக செரிஊட்டப்பட்ட யுரேனியத்திற்குப் பதிலாக இயற்கையாக கிடைக்கும் யுரானிய தாது பயன்படுத்தப்படுகிறது. இதில் வெளியாகும் நியுட்ரானின் எண்ணிக்கை செரியுட்டப்பட்ட யுரேனியத்தில் வெளியாகும் எண்ணிக்கையை விட குறைவாகும்.

அணுஉலையின் அமைப்பு 

1	Fuel bundle	8	Fueling machines
2	Calandria (reactor core)	9	Heavy water moderator
3	Adjuster rods	10	Pressure tube
4	Heavy water pressure reservoir	11	Steam going to steam turbine
5	Steam generator	12	Cold water returning from turbine
6	Light water pump	13	Containment building made of reinforced concrete
7	Heavy water pump

                      இந்த அணு உலையின் நடுவில் உள்ள எரிபொருளில் இருந்து வெளிப்படும் நியுற்றான்கள் Moderator எண்ணும் மிதமாக்கியால் மீண்டும் எரிபொருளுக்கே திருப்பி அனுப்பப்படுகிறது. இதனால் சங்கிலி தொடர் வினை நடக்கிறது அதனால் உண்டாகும் வெப்பத்தினால் எரிபொருள் குழாயில் சுழற்சியாக செல்லக்கூடிய அழுத்தப்பட்ட கனநீர் சூடாகிறது. இந்த சூடான கனநீர் பாய்லர் உள்ளே சுழற்சியாகும் போது பாய்லரில் உள்ள சாதாரண நீர் நீராவியாகி டர்பைனை சுழலவைக்கிறது.
                    இதில் அணுஉலையின் ஆற்றல் இருவிதமாக கட்டுப்படுத்தப் படுகிறது.ஓன்று கட்டுப்படுத்தும் கழிகள் (Adjuster Rods) மற்றும் மிதமாக்கி (Moderator) ஆகிய இரு வழிகளில் கட்டுப்படுத்த முடியும். மேலும் அவசர நேரங்களில் உடனடியாக அணுஉலை இயங்களை நிறுத்த  மிதமாக்கி (Moderator) ஐ அணுஉலையை விட்டு கீழே உள்ள தொட்டியில் கொட்டிவிட்டால் சங்கிலி தொடர் வினை நிறுத்தப்பட்டு விடும். அதற்கேற்ற அமைப்பு உள்ளது அது மேலே உள்ள படத்தில் காண்பிக்கப்படவில்லை.
                      இந்த அணு உலை முன்பு குறிப்பிடப்பட்ட BWR அணு உலையை ஒப்பிடும் போது சில சாதகங்கள் உள்ளது.

• இதில்  கனநீர், நீராவியாக கூடிய சாதாரண நீர்   இரண்டும் இருவேறு சுற்றுகளாக இருப்பதால் கதிரியக்கம் அணு உலை உள்ள கட்டடத்தை விட்டு வெளியே பரவுவது எளிதல்ல.
•  இதன் எரிபொருள் தயாரிப்பு செலவு முந்தையதை ஒப்பிடும் போது குறைவு.
• கதிரியக்க பரவுதலும் குறைவாகும்.
• முந்தையதை ஒப்பிடும் போது பாதுகாப்பு அதிகம்.
• ஆனால் கனநீர் தயாரிப்பு செலவு அதிகம்.

அடுத்த பதிப்பில் தொடருவோம்.